Furlan

La archeologjie in epoche romane intal Friûl Culinâr

Mappa Archeologica [TRaslate]
Mappa Archeologica

La volontât di aprofondî la cognossince dal patrimoni archeologjic che si cjate sul teritori, rapresentade des Aministrazions aderentis al Servizi Associât Culture de Comunitât Culinâr (Comuns di Buie, Cjassà, Colorêt di Montalban, Cosean, Dignan, Feagne, Forgjarie, Maian, Murùs, Osôf, Ruvigne, Rivis Darcjan, San Denêl, San Vît di Feagne e Trep Grant), al à motivât un progjet specific destinât ae racuelte dai dâts utii par une ricostruzion storiche dal asset insediatîf in epoche romane. A front di diviersis ricercjis preliminârs si à rivât a rilevâ che la aree interessade no risulte, fin cumò, ogjet di un studi globâl e esaustîf che al definissi lis modalitâts e i timps de ocupazion umane intal so disvilup diacronic. Di fat lis ricercjis fatis intai agns ’90 dal Dipartiment di Siencis de Antichitât de Universitât di Triest par cont de Regjon Friûl Vignesie Julie cul fin di preparâ une cjarte archeologjiche pe revision dal Plan Urbanistic Regjonâl, a àn cjapât dentri la zone in cuistion dome in part e in relazion ai elements de centuriazion visibii.
Intal 2007 la ricercje, par cure de dotore Tiziana Cividini in colaborazion cui esperts locâi, e à puartât ae realizazion dal prin volum “Il territorio della Collinare in epoca romana”. Si trate di une prime sintesi inzornade dai dâts storics e archeologjics cognossûts pal Friûl Culinâr e e rapresente un pont di partence par un progjet plui detaiât di valorizazion dal patrimoni storic-archeologjic di chest ambit. I risultâts des ricercjis bibliografichis a contribuissin di une bande a incressi lis cognossincis par chest periodi storic, di chê altre a dimostrâ la pussibile fertilitât in câs di une continuazion plui analitiche dai studis.
I studis a àn permetût di stabilî la presince di insediaments une vore antîcs, metint in lûs la consistence e l’interès des testemoneancis archeologjichis censidis che a son plui di 260 lûcs. Di rilevâ che, dopo la jessude de publicazion, a son rivadis altris segnalazions di evidencis storichis de bande dai passionâts locâi.
Inte Primevere dal 2009 si è tignude la presentazion de seconde publicazion “Frammenti di vita quotidiana” dedicade ai aspiets plui comuns dal vivi di ogni dì in epoche Romane inte Culinâr, fasint viodi un cuadri de vite jenfri il II secul prin di Crist e il tart antîc midiant la analisi des tantis tipolologjiis insediativis ricognossudis intal teritori come vilis rustichis, cjasâi e insediaments plui piçui, acompagnade di une presentazion dai materiâi di ûs comun intai singui sîts storics.
Partant si è pensât di puartâ indenant il progjet cu la realizazion dal III volum che al dedi dongje lis testemoneancis sul mont dai muarts, cu la presentazion des carateristichis dai rituâi di cremazion e inumazion, cuntune liste dai dâts cognossûts e un aprofondiment su lis principâls necropolis vignudis a lûs intal comprensori tratât. Cun di plui al è evident che la puartade di une operazion culturâl dal gjenar e podarès jessi ancjemò svilupade cuntune serie di cunvignis e la partecipazion di studiôs locâi e forescj.
La publicazion “Il Territorio della collinare in epoca romana III. Rituali e società nelle necropoli friulane”, simpri par cure de dotore Tiziana Cividini, e je stade presentade di pôc intal Cjistiel di Colorêt di Montalban e dât fûr in dutis lis librariis locâls e nazionâls dal Editôr Gaspari.