Furlan

I FEUTS CULINÂRS

Il progjet “I Feuts  Culinârs”, inviât intal 2007 cun valence trienâl, al à preparât lis basis pe racuelte de bibliografie esistente su la ete feudâl e sul feudalisim di lunc periodi inte aree culinâr, par realizâ un Atlant des Culinis morenichis che su base informatiche (e daspò su supuart di cjarte) e rapresenti la situazion de ricercje intal teritori de Culinâr (storie istituzionâl, storie economiche e sociâl inte ete di Mieç e in ete moderne, etnografie, storie de art, gjeografie dal paisaç) organizant la materie in diviers layers.Vie pal 2008 al è stât completât l’Atlant Informatic, dentri di un sisteme dinamic, in grât di sustignî e integrâ desenis di nivei di informazions diviersis e di costituî un strument in progress par inzornaments seguitîfs. In plui e je stade presentade, inte Sede consortîl, la mostre storiche “I feuts culinârs, paisaçs e lûcs de comunitât – de ete di Mieç ae ete Napoleoniche” cu la ativazion ancje di visitis vuidadis didatichis pes scuelis dal comprensori. La ricercje, curade di un grop di studiôs responsabii dai singui setôrs di studi in racuardi cui ricercjadôrs individuâts dai singui Comuns, al à prodot tant materiâl – ancje inedit – che al merete di jessi ancjemò studiât e aprofondît inte totalitât. Par esempli, la ricercje complete e la digjitalizazion di ducj i regjistris canonics dal Cinccent – Sietcent des parochiis dai Comuns che a fasin part de Comunitât Culinâr al permet un ûs par une ricercje aprofondide e minude sul andament demografic.Al è duncje stât publicât il volum “Feut e Comunitât. Il Friûl Culinâr de ete di Mieç ae ete di Napoleon” (dât fûr de Forum Editrice Universitaria di Udin) che al met dongje sedi i risultâts bibliografics dal sît web che la iconografie de mostre, inricjît di saçs origjinâi dai colaboradôrs sientifics – su la fonde des ricercjiis fatis – cu lis carateristichis dal teritori, la costruzion e la trasformazion dai cjistiei, i lûcs e lis trasformazions dal podê signorîl, religjôs e lis formis associativis de comunitât, lis liendis, il vecjo sisteme viari, la demografie, lis espressions artistichis.La iniziative e je stade finanziade dal Servizi Associât Culture de Comunitât Culinâr dal Friûl, de Regjon Autonome FVJ – Assessorât ae Istruzion e Culture, de Provincie di Udin e de Fondazion CRUP.Un grant ringraciament al comitât tecnic sientific e ai referents storics dai singui Comuns de Comunitât Culinâr dal Friûl.Il volum al è in vendite in dutis lis librariis de regjon o pûr cjapant contat cul editôr:  Forum Editrice Universitaria Udinese S.r.l.

via Larga, 38 - 33100 Udine
Tel +39 0432 26001 / Fax +39 0432 296756
e-mail forum@forumeditrice.it


Par viodi l'Atlant storic-bibliografic dal progjet
http://www.tommasomazzoli.it/feudicollinari/